Како
да нарачате вино во ресторан
 Добрите
познавачи на виното секогаш кажуваат дека квалитетното
вино би требало да се конзумира заедно со добра храна.
Порачувањето вино во ресторан може да биде застрашувачко
– особено ако картата со вина е скапа и ако Вие треба
да го изберете виното. Но, не плашете се, малку од
луѓето ги познаваат сите вина од картата, а и во
многу ресторани послугата е во можност да Ви одговори
на поставените прашања за нив.
Обидете се да дознаете што ќе порачаат луѓето со
кои сте на заедничка маса, какво вино претпочитаат,
бело или црвено. Исто така може да го прашате Вашиот
келнер за сугестии или да порачате повеќе разни вина
во помали количини.
Добра винска карта вклучува добро познати производители
на вино и вински региони и многу е веројатно да ги
препознаете
вината кои сте ги пробале претходно.
Ова е добра стартна точка за откривање на нови вина.
Вашиот келнер може да Ви помогне во изборот врз основа
на вината што веќе ги имате пробано. Може да пробате
иста сорта вино, на пример Ризлинг, од друг произведувач.
Колку повеќе видови на вино пробате, станувате поинформирани
за изборот и квалитетот на виното, со што станувате
посамоуверени при следното нарачување.
Стареење на виното
Постои едно големо недоразбирање, а тоа е дека виното
мора да старее. Факт е дека, секаде во светот,
најчесто се пие младо вино, приближно 12 до 18 месеци
откога е направено, па дури и вина кои би биле подобри
ако остарат. Битно e да се напомене дека белите вина
се наменети да се пијат во следните две години откако
се произведени, но голем број од црвените вина стануваат
подобри со нивното “стареење“.
Зошто црвените вина стануваат подобри со стареењето?
 Toa
се должи на состојката танин која се наоѓа во семето
и лушпата на грозјето. Танинот го дава големиот потенцијал
за стареење на виното со спората оксидација. Екстракцијата
на танинот е многу битна во процесот на создавање на
виното. За разлика од сокот од белото грозје кој се
истиснува од лушпата пред процесот на ферментација,
црвеното вино ферментира заедно со лушпата на грозјето.
Кога црвеното вино е “младо“, неговиот танин е нов
и горчлив. Со текот на времето молекулите на танинот
се спојуваат со пигментините молекули на виното и формираат
долги полимери. Кога овие полимери ќе израснат доволно
долги, комплексната структура на виното ќе се изедначи
и стане попријатна за пиење. Овој процес почнува со
смекнувањето и ферментирањето и продолжува откако виното
биде ставено во шишиња.
Најдобри услови за виното да “остари“ е да биде ставено
во поголеми шишиња, на униформни температури (околу
6-13 степени). Поголемата температура го забрзува
стареењето на виното. Со менување на температурата,
при затполување тоа се шири, а при намалување се собира
и тапата може да излезе повеќе или да се вовлече внатре
во шишето, при што ќе се овозможи да влезе кислород
внатре во шишето. Ако влезе доволна количина на кислород,
тоа мoже да го расипе виното. Значи, за да може виното
да остари на вистинскиот начин, треба да се складира
на вистинскиот начин.
Складирање на виното
 Оптимални
услови за чување на виното се стабилна температура
околу 6-13 °С, влажност од околу 80%, и во темно
место. Се препорачува температурата да се одржува
константна, бидејќи промената на температурата може
да го расипе квалитетот на виното. Влажноста е исто
така битен фактор при складирањето на вино. Ако таа
е над 80%, може да предизвика создавање на мувла,
додека па екстремно суви услови може да предизвикаат
испарување и изложување на кислород што исто така
може да го расипе виното.
Многу поверојатно е виното чувано во темно место,
да ја зачува својата бистрина. Светлото ги предизвикува
протеините во виното да го направат заматено, како
и други непријатни ефекти, како непријатна арома
и вкус. Затоа најпогодни места во домашни услови
се подрумите. Ако немате подрум, вашето вино сместете
го во климатизирана просторија која малку ја користите.
Служење на виното
Виното ја има моќта и обичното мени да го направи
гозба, да инспирира разговор при вечера, да го
зголеми расположeнието. Во продолжение следуваат
неколку совети за служење на виното.
Служење на виното на правилната температура
Температурата влијае на вкусот на виното можеби
најмногу од сe. Сервирање на оладено вино ги маскира
несовршеностите кои ги има виното - добро ако служите
младо или ефтино вино, додека сервирањето на потопло
вино дозволува да се осетат сите негови карактеристики
– одлично за постари и поскапи вина.
Црвените вина треба да бидат малку поладни од собната
температура, но никогаш не смее да бидат топли.
Шише црвено вино кое на допир изгледа топло треба
да се олади во фрижидер додека да стане свежо,
но не студено.
Белите вина се најдобри кога се ладни. Шише вино
се лади по 2 °C секои 10 минути во фрижидер, а
оставено на собна температура се топли со приближно
исто темпо, во зависност од температурата на собата.
За брзо ладење на шише со бело вино, 35 минути
во замрзнувачот би ја завршиле работата. За да
се одржи температурата на оладеното вино, положете
го виното на кофа за ладење наполнета со лед.
| |
Температури
за сервирање
• Бело вино 6-10°C
• Пенливо вино 9-12°C
• Розе вино 9-12°C
• Црвено вино 16-20 °C |
 Налевање
на виното со префинетост
Вината обично се налеваат кон средината на чашата,
додека пенливите вина би требало да се налеваат
по ѕидовите на чашата за да се задржи пенливоста.
При налевање на виното, тоа често капе, но постојат
неколку елегантни начини за тоа да се спречи. Едниот
начин е да се стави мал, кружен диск околу главата
на шишето, кој ги задржува капките во шишето. Исто
така може да се стави некоја ткаенина околу главата
на шишето која ќе ги впие истечените капки.
Може и да ја искористите и техниката “тури и заврти“.
Кога ќе завршите со налевањето, свртете го шишето
додека го тргате од чашата. Оваа метода е речиси
безгрешна, но Вие за секој случај имајте салвета
при рака.
Полнење на чашата со вистинската количина
Капацитетот на чашите варира од чаша што може да
собере неколку децилитри до чаша што собира дури
и цело шише вино. Не земајќи ја во предвид големината
на чашата, треба да ја полните додека да стигнете
до најширокиот дел или приближно 2/3 од чашата.
Ова растојание помеѓу виното и работ е многу важно
бидејќи дозволува виното да ја испушта својата
арома.
|
